藝人張頴康剛同太太麥雅緻慶祝結婚13年，原來佢人生都有新發展，今日佢發文表示要離

藝人張頴康剛同太太麥雅緻慶祝結婚13年，原來佢人生都有新發展，今日佢發文表示要離開工作19年嘅無綫，感激多年嚟嘅演技訓練，更令佢認識到好太太麥雅緻，可以好自豪表示自己係「TVB栽培出嚟嘅演員」，但未有表示自己下一步有何新發展。

張頴康離巢長文：

再見了TVB！所以喺TVB嘅最後一日，影咗啲相留念！

19年，真係一個唔短嘅日子！拍完最後一個鏡頭，原來眼淚真係會忍唔住流咗出嚟！

19年前，獲安排咗我加入TVB嘅訓練班，希望我可以好似家棟哥哥一樣，接受TVB木人巷嘅訓練！我好記得入TVB前，家棟哥哥同我講咗句說話：「入到去，乜都唔好理，耷低個頭就做，你一定會學到嘢！」

確實，遵從呢句說話，19年後我真係成為咗一位實實在在嘅演員！多謝你哋！

同10年前我攞飛躍進步男藝員上台時講嘅一樣，我要多謝家豪哥，小青姐，黃偉聲，張乾文，陳志江，方俊釗！多謝你哋俾咗好多機會我，成就我演出咗多個感動到觀眾嘅角色！

喺最近呢幾年，我好慶幸可以同77工作室合作多部劇集！我特別要多謝佳哥（鍾澍佳）對我嘅支持同鼓勵，令我愈演愈有信心，讓我喺呢兩年內對演戲領會到另一個層次！

多謝TVB！多謝你俾咗我一個咁好嘅平台，讓廣大嘅觀眾認識到我呢位演員！多謝你俾我認識到我眼中獨一無二嘅女神麥雅緻，然後仲成為咗我嘅老婆，畀咗我一個幸福完美嘅家庭！

好喇！19年後嘅今日，我終於可以好自豪咁講一句：「我張頴康，係TVB栽培出嚟嘅演員！」

各位戰友，江湖見！