摩特歷接受晚郵報訪問，被問到係咪細細個嘅時候就係AC米蘭球迷？ 佢話係呀，因為佢偶像係波班，1998年呢位克羅地亞隊長仲爭啲幫球隊贏得世界盃。呢位40歲球員亦都好感謝大家將佢同派路相提並論，咁樣令佢感到榮幸，而佢自己除咗波班之外，偶像係托迪，佢認為意甲有好多優秀嘅球員，以前睇住佢哋踢波，亦都對自己講，呢啲係佢想踢嘅足球。摩特歷認為安察洛堤係第一嘅，好難用言語去解釋，不單止係佢執教嘅能力，仲有佢為人處事嘅方式，佢哋喺馬德里共事嘅時候，經常講起米蘭市同 AC米蘭。佢仲記得第一次同對方會面嘅情景，當時佢自己一個人喺城內，安察洛堤就打電話俾佢，叫佢一齊食晚飯，大家傾咗幾個鐘，期間無所不談，有講足球、家庭、生活，通常教練好難俾到球員信心，但安察洛堤可以。 呢位AC米蘭14號球員認為艾歷尼有啲似安察洛堤，風趣、敏感、喜歡開玩笑，但係作為教練佢係大師級嘅，對足球嘅理解，好少人能媲美。佢亦承認曾經100%認為會喺皇家馬德里退休，不過有時人生就係難以預計。對於克羅地亞能夠喺2018年取得世界盃亞軍同2022年攞到季軍，摩特歷認為心態好重要，佢哋識得點樣承受痛苦，永不放棄，從小就被教導要有成就，就必須奮鬥，天賦才能當然重要，但並唔足夠，佢認為戰爭嘅經歷對佢哋呢一代克羅地亞人嚟講產生咗影響。被問到同伊巴謙莫域呢位紅鳥顧問關係如何，佢話好好，但見面嘅時候會用佢哋嘅母語，塞爾維亞同克羅地亞話溝通，其他人聽唔明嘅。而能唔能夠好似伊巴謙莫域回巢作為球員一樣，取得意甲冠軍？佢話球季好漫長，對手亦都好多，一切都有可能，永遠唔能夠否定可能性，教練工作出色，佢哋仲有好多提升空間，佢哋係AC米蘭，目標係問鼎冠軍。🇭🇷
