【On.cc】陳展鵬憶當年笑住換片　蕭正楠爆囝囝愛聽自己唱歌

由曹永廉、蕭正楠、吳若希及車婉婉擔任「五星級求生教練」的綜藝節目《夫妻肺片》昨晚進行錄影，視帝陳展鵬、雨僑及賴慧玲等以「星級戰友」身份現身節目，分享夫妻相處和照顧小朋友遇到的種種問題。

雨僑笑指老公羅力威不論作為男友和丈夫時也對她照顧有加，但大爆在照顧孩子方面則變成「豬隊友」，她説：「因為我哋嘅父母住得遠，所以主要靠我哋兩個去上堂學幫BB沖涼、換片、餵奶。」她笑指雖然老公很努力嘗試，但每當孩子哭鬧時便「搞唔掂」，戴上降噪耳機並立即走出屋外，待孩子安靜下來才返回家中，她笑謂：「後來進步咗，戴住耳機勉強地換片同餵奶，因為佢對聲音好敏感唔可以嘈，一嘈就覺得會炸爆耳膜。」她笑稱雖然子女已分別3歲和5歲，但老公仍然需要戴耳機避開噪音。

陳展鵬（左起）、雨僑及賴慧玲做節目嘉賓。

雨僑爆羅力威對聲音好敏感，依家都仲要戴降噪耳機對住小朋友。

陳展鵬則覺得戴耳機是好方法，笑言若太太再生自己可考慮以此方法應付BB喊聲。現時跟太太單文柔育有女女「小豬比」的他，透露夫婦二人會不時檢視自己湊小朋友的方式，笑指女兒還小時，因為自己不熟手，每次換片時都雖然雞手鴨腳，但為免讓女兒覺得自己做錯事，因此會設法保持一個平和表情繼續換片：「起碼會緩和咗佢情緒，我哋會笑住換，哈哈！」他又分享了一件趣事：「有段時間望住個小朋友，覺得佢好得意，但會發覺佢瞓覺嗰陣個頭會變大，唔係一次喎，我講出嚟啲人覺得我傻咗。」雨穚即附和表示自己也有這個發現，指每當看見孩子睡覺時頭仔漲起來，便知道他開始進入熟睡。

另談到展鵬近日愛上打匹克球，向來熱愛運動的他，表示有跟太太一起去學，提到有網民搞笑提議他下次可以拿「煎Pan」去打，展鵬笑指提議不錯，可考慮在慈善節目上表演。

陳展鵬指依家仍會不時檢視自己湊小朋友方式。

同太太夾好咗要笑住換片。

至於作為主持的蕭正楠，表示自己可從嘉賓身上學到不少湊小朋友技巧，他説：「我都係啱啱做咗爸爸一年，阿廉（曹永廉）仔仔都18歲，有啲嘉賓嘅小朋友仲大啲，大家分享過程中可以互相提醒，其實每個都係求生專家。」他大讚曹永廉仔仔玩得一手好結他，更曾特意學習了一首歌，於他跟曹永廉開騷時上台演奏，大讚他很有天分和台型。問到是否培養仔仔入行？曹永廉表示將預備升讀大學的仔仔本身喜愛音樂，平日有夾Band比賽，但沒有表示想入行，蕭正楠即表示羨慕，也希望自己仔仔「蕭哈哈」將來可上台一起玩音樂。

談到二人加上馬國明早前於內地登台時，阿廉因「港普」發音，將「癡心」唱成「黐線」成為焦點並引起熱議，曹永廉坦言有因此又不開心，他解釋本來有兩種版本歌詞，自己練了其中一款，但演出時卻唱了另一版本：「我覺得非常之唔開心，但出嚟回響啲人又唔怪我，仲覺得幾得意，但都希望唔好再有下次。」他坦言有感不專業，但又搞笑指自己一向也是如此，觀眾應該習慣，蕭正楠即安慰他，指觀眾就是喜歡他這一面，叫他要Keep住。

他們透露已接獲不少商演邀請，未來要不時兩邊走演出，問到蕭正楠豈不是少了時間見仔仔？他即笑謂：「我諗我所有騷加埋都唔夠太太（黃翠如）今次離開咁耐，哈哈！我都問會開成個月騷，我們每次都盡量縮減時間，佢哋都好很明白我，希望騷之前一日綵排，第二日就表演，盡量兩日內完成，盡量可以早啲返去睇個仔。」他又指覺得仔仔已準備好，等翠如回來之後，若夾啱時間也希望帶仔仔去到現看爸爸演出：「依家喺屋企有時播歌、我唱歌畀佢聽，佢會好開心拍手，佢好鍾意聽到我唱歌。我覺得血緣呢樣嘢，你花時間愈孵，就算佢將來忘記咗，但過程中你會覺得同佢連繫深咗！」他冧爆表示仔仔近來比以前依賴他多了，會自己爬過來要抱，又會捉實他，感覺好像怕爸爸又要出門上班似的。

阿蕭指太太翠如還多拍兩星期才回港，但自己很鼓勵太太繼續工作，他説：「我都覺得係辛苦咗佢，呢段時間又懷胎，又照顧BB，佢能夠做番自己鍾意嘅嘢，我一定要支持佢！」他又指即使仔仔近來開始黏他，但自己很公平，會教仔仔一定以媽媽為先：「就算依家佢成日叫我爸爸，我都會叫佢叫媽媽先，媽媽生你出嚟係辛苦過爸爸。」

蕭正楠想夾時間帶囝囝去到現睇自己演出。

蕭正楠依家同阿仔連繫深咗好多。

曹永廉因唱歌咬字被笑，佢直言好唔開心。