【On.cc】蔡思貝想自組公司做老闆？親解有冇被周星馳鬧之謎喪賣口乖...

視后蔡思貝、李炘頤（Alina）、俞可程、倪樂琳、宋宛穎、濱口愛子、伍允龍及女友李蔓瑩等昨晚上（28日）出席電影首映。穿上旗袍的蔡思貝身形弗爆，表示很高興可以出席今次首映，她説：「因為呢部戲係我細個最喜歡嘅電影之一，但今日可以盛裝參加，令我自己都好似電影嘅一部分嘅感覺！」

她直言若能跟戲中演員合作，或拍到一部這麼有標誌性的電影是自己的夢想。談到她早前到尼泊爾作慈善探訪，她表示此行讓她感受深刻，跟當地的個案接觸後，更讓她感恩自己所擁有的幸福生活，坦言童婚問題最讓她感到無奈：「呢啲聽咗係特別無奈，你見到一個好乖嘅小朋友，佢只係想佢爸爸開心，就寧願自己冇得返學、無選擇，然後就要喺人哋屋企做家務，冇咗自己嘅一生，呢件事我特別心痛。」本身有助養兒童的她，此行再助養了一個五口家庭，坦言短短7天行程其實做不了甚麼，最重要是希望之後能以自身作宣傳，呼籲社會各界募捐，籌更多善款去幫助當地有需要的家庭改善生活質素。

早前正式離巢無綫的蔡思貝，表示除了希望在慈善上做得更多，工作上亦希望作多方面嘗試。提到同樣離巢的李佳芯（Ali）接拍港版《悠長假期》，思貝直言替對方高興：「我覺得劇有劇緣，演員都有唔同嘅緣分，我覺得Ali咁啱遇到呢個神劇嘅角色，都戥佢高興，我希望嚟緊都遇到適合我嘅劇本。」她透露有好幾部電影和舞台劇合作正洽談中，問到會否自組公司？她表示也有這個想法，但因當中涉及不同範疇的知識，需要先向更多有經驗的人士請教後再作打算：「如果可以靠自己去營運一件事，好多嘢可以學習，都好想試一下。（嚟緊向電影方面發展？）如果你問我最夢想自己想做嘅事，我係想試拍電影，因為我未有機會接觸好多，之前可能係客串下。」問到想跟哪位導演合作？她表示之前跟周星馳合作已實現了她其中一個夢想，若有機會也希望能跟王家衛及張艾嘉等導演合作。

談到有份演出星爺新作《少林女足》，問會否希望長駐做星女郎？她即自薦：「有呢個機會會好開心，因為佢係電影界嘅神，好多藝人都想同佢合作，自己覺得同佢合作一次唔夠喉，因為有太多可能性，希望畀呢位導演（星爺）發掘出來。」

問有沒有被星爺鬧過？她再賣口乖說：「我唔會覺得係畀佢鬧，係佢好慷慨分享佢想發畀我知，等我可以好好發揮，如果一個導演唔肯去溝通，我反而會唔開心！佢的確有分享佢諗法，我好開心！」

蔡思貝旗袍Look睇首映。

同場遇馮素波。

思貝都想同有機會同梅姨合作。

思貝都想自組公司。

俞可程表示電影首集於20年前上映，自己雖仍未看過，但已在網上搜尋過相關短片理解故事。提到電影講述霸氣上司，她自爆入行前從事測量師工作時，也遇過充滿氣場的上司，但覺得作為上司有氣場也屬必要，不過就令她感壓力，更曾因犯錯被對方責難：「做錯嘢個客鬧公司，上司鬧我，都有啲唔開心，惟有從錯誤中學習。」她透露現時亦有從事調解員助手工作，問到本身已有資訊節目及《女神配對計劃2》要忙，時間如何分配？她説：「我就係鍾意忙。（若將來《女神2》搵到男友點分配？）啱啱熱戀當然會擺多啲時間，7成時間拍拖工作3成，到感情穩定咗咪減少啲。」她又表示身邊有男性朋友想報名《女神2》找女神：「有啲話鍾意郭珮文幽默同靚。（唔係身材？）我相信Body都應該係其中一個因素。」她表示另有一位年紀相對大的表示喜歡阮嘉敏，笑言因貪其喜愛做家務，問到有否追求者想參加？她説：「有啲人話想參加但唔想出鏡，就話不如私底下出嚟食飯。」她笑言也收到不少追求者邀約食飯短訊，問到那豈不是可以退出《女神2》？她笑謂：「唔得，睇定啲先，哈哈！」

俞可程小背心現身。

早前獲拍拖9年的MIRROR成員邱士縉（Stanley）求婚、預備正式升為人妻的Alina，透露婚禮已籌備得差不多，但仍未挑選心水婚戒，笑指因自己向來「大頭蝦」經常遺失物件，擔心之後會丟失婚戒，故不打算揀選太貴重的款式，她說：「有時因為做嘢逼住要除，真係會驚唔見。（如果Stanley唔見咗？）我都會原諒佢嘅。」她表示已聘請婚禮顧問協助籌備婚禮，自己亦邀請了6位好友擔任姊妹團，當中包括圈中人。另提到她早前在巴黎擺烏龍，原本想預訂一間高級餐廳跟3位好友享用晚餐，卻「大頭蝦」錯手訂了19位變成「包場」，她笑指絕對是人生最蝦碌事件：「錢好辛苦搵番嚟㗎！（叫Stanley畀番？）梗係唔得啦，我哋財政獨立，自己衰自己畀番。」她坦言發現當刻已嚇得「震騰騰」，冷靜過後再吃過美食也只可乖乖找數：「都係自己衰，咪當送個生日Party畀自己，不過冇人嚟啫，哈哈！（Stanley有冇笑你？）佢話『又係咁？都係你性格吖，你都要畀啦唔係點啫。』」

Alina預備正式升為人妻。

至於濱口愛子對於老公吳業坤選擇離巢TMG並考慮自組公司一事表示支持，提到老公表示為了出歌未來要開源節流，問到會否擔心影響生活質素？她説：「唔擔心，佢會好努力工作。（老公減家用？）唔會。」提到她早前拍片表示想返回日本，她笑稱只是想回去看櫻花，並非因不適應香港生活，叫大家不要擔心：「我好鍾意香港，Enjoy香港生活。（之前老公生日點慶祝？）喺屋企簡單慶祝。」談到老公表示將生B計劃再度延遲，她表示自己也希望先努力學習獨立，融入香港生活方式並努力工作，因此並不急於生B。

濱口愛子對老公吳業坤選擇離巢TMG表示支持。

李尹嫣紅絲搶晒鏡。