滕麗名相隔9年再拍正劇兩邊奔波自認「賤骨頭」 自薦上紅館免費為古天樂伴舞.滕麗名（阿滕）主演嘅處境劇《愛·回家之開心速遞》快將結束，佢相隔9年再接拍正劇《模範律師團》，今日（14日）喺深圳出席開鏡儀式時透露興奮大過緊張。阿滕喺新劇中飾演羅嘉良太太，但暫時未正式埋位。佢笑言自己有啲「犯賤」，係「賤骨頭」，鍾意忙碌：「《愛回家》仲未拍完，所以近來要兩邊走，但忙碌係好事，好開心。加上今次好多演員都未合作過，雖然曾同嘉良哥合作《難兄難弟》，但對手戲都唔多。」佢慶幸今次唔係演律師，笑指對白多會「嘔泡」，今次角色有好幾個面向，有挑戰性。

講到《愛回家》幾時拍完，阿滕話唔知道，透露大結局嘅劇情由觀眾投票決定，笑謂自己嘅部分應該都係同「大小姐」林淑敏爭奪接龍集團CEO職位。新一輯處境劇《愛·回家之三代同糖》接棒播出，阿滕表示仍未收到公司通知會唔會演出，指演員係被動等安排。問到可會唔捨得，佢話：「每個人都有新嘗試，觀眾都想睇新嘢，可能下一次大家又會返嚟。但我都唔捨得一班演員，劇集快結束先知道原來好多觀眾都係睇《愛·回家》大嘅，9年對大家嚟講係一個階段，有歷史性，相信觀眾都會掛住我哋。」

另外，講到古天樂將於8月在紅館開騷，阿滕揚言一定要撲飛支持，仲自薦上台伴舞，笑言唔收錢都要上台跳《今期流行》。

TVB