張曦雯自爆做「最不受歡迎人物」 陳煒解構「高成彬」成魔關鍵. 張曦雯（Kelly）同陳煒（煒哥）今日（14日）喺深圳出席新劇《模範律師團》開鏡儀式。Kelly透露自己喺劇中係「最不受歡迎人物」，同楊茜堯、劉佩玥都係羅嘉良嘅徒弟，為咗爭上位會勾心鬥角。佢話仲未同羅嘉良正式對戲，但前一晚飯局已經感受到對方嘅風趣幽默：「我一見到佢就嗌佢師父，佢見我生得高就話『妳係高，但我都唔矮』，好風趣。」Kelly近日明顯瘦咗，佢話冇刻意減肥，反而好努力食嘢，尤其喺內地叫外賣好方便，相信拍完會肥返。

《模範律師團》係《正義女神》嘅衍生劇，時間線設喺《正》劇8年前。煒哥透露今次會交代更多母子情，解構劇中兒子「高成彬」點解會變成殺人狂魔。佢話佘詩曼唔會參演，「高成彬」嘅爸爸亦唔會出現。今次煒哥嘅角色唔會好似《正》劇咁不擇手段，但會由好變壞，有明顯轉變。佢同羅嘉良飾演師兄妹，最後會揭穿對方嘅另一面。煒哥又話好開心可以同楊茜堯合作，笑指大家係同年代演員，以前喺唔同電視台好難合作，雖然之前一齊拍過《法網狙擊》但冇同場戲，今次係第一次正式合作，好期待。佢話劇中有大量法庭對白，要努力背書，輸人唔輸陣。TVB