《飛常日誌II》廣州造勢 郭柏妍人氣勁 高海寧盼遇暖男求心安愛情. TVB劇集《飛常日誌II》主要演員高海寧、洪永城、劉穎鏇、郭柏妍、吳偉豪、戴祖儀、鍾柔美等昨日（13日）到廣州商場出席粉絲見面會，吸引大批粉絲及市民圍觀，其中以郭柏妍嘅粉絲聲勢最浩大，有香港粉絲專程攜帶巨型應援牌前來。眾演員喺台上分享拍攝點滴之餘，亦專業介紹內地及香港國際機場嘅最新設施及服務資訊，客串做司儀嘅洪永城就不時戲弄戴祖儀，唔俾對方講話，逗笑現場觀眾。

洪永城劇中延續第一輯嘅暖男角色，連高海寧拍攝完後都改變咗對感情嘅看法。佢話：「後生嘅時候會追求有心動嘅感覺，但而家了解到成年嘅感情，係需要陪伴同唔使花言巧語，有無微不至嘅行為已顯得係對你在乎，可能自己而家都要追求一份心安同細膩嘅感情。」洪永城認為今輯角色加強咗人設，直言做暖男係要有守護對方嘅心。問到高海寧現實中可有遇到呢種暖男，佢話：「好男人係有嘅，但我未遇到，要相信有希望。我都希望演多啲呢種角色，之前拍太多爭鬥同有陰暗面嘅角色。」

洪永城除咗有新劇推出，佢同黃翠如嘅旅遊節目都緊接推出，佢笑言希望觀眾唔好睇膩佢，因為旅遊節目都相當有可觀性。高海寧就記得佢曾經一晚有3個節目推出，笑稱洪永城而家有多節目出街，係被公司力捧嘅證明，洪永城即話：「原來係咁，多謝公司，我會叫經理人唔好理會其他人，先幫我盡量搵工作啦。」

吳偉豪同郭柏妍劇中有感情線，仲有機會喺機場跑道拖手拍拖，諗起畫面已經覺得極浪漫。郭柏妍表示劇本原意係佢演嘅機師喺駕駛艙內，望向喺維修坪工作嘅吳偉豪，可惜因安全問題未能實現。吳偉豪就話曾同做機師嘅哥哥喺跑道上相遇：「當時我喺停機坪拍攝，啱啱哥哥就準備開飛機起飛，因為我有事先通知佢喺邊度拍，佢喺駕駛艙內見到我，我都即刻拎手機向佢影相，呢種機會十分難得。」

提到《愛·回家之開心速遞》下月完結，吳偉豪表示結局戲份尚未拍攝，亦未知劇情走向，話：「都有啲唔捨得，不過人總要向前行，聽聞劇組會收集觀眾意見再拍大結局，說不定郭柏妍都可以返嚟再客串做『女土著』。」郭柏妍就難忘參演《愛·回家》時，難得同劉丹等「熊家」聚首一堂。另被問到知唔知曾傳緋聞嘅丁子朗開畫展，對方並表示來年會有一個情劫，郭柏妍話：「係嗎？我唔知道。情劫都有好同唔好嘅，我自己好少去算命，就算有都係當提醒自己。」

鍾柔美戥師妹李茵彤接劇開心

鍾柔美（Yumi）好高興能夠參演同航空業有關題材嘅劇集，佢除咗有追睇第一輯故事，亦係《衝上雲霄》系列劇集嘅擁躉，並話：「如果有機會都想試考做機師，不過都要睇自己嘅能力同時間安排。」有傳《聲夢2》嘅師妹李茵彤取代Yumi拍攝新一輯處境劇，Yumi話：「工作都要睇緣分，好替佢高興。其實我同佢係同月同日生日，見到其他藝人朋友有工開都會替對方開心，希望佢拍得開心同健康就足夠。」問Yumi有冇自薦演新處境劇，佢話：「都係順其自然，我入行初心都係想唱歌同跳舞，好細個嘅時候都做過童星。」劉穎鏇趁拍攝劇集首次到訪蛇口同珠海嘅機場，佢高興話今次拍攝如同一大班朋友去旅行一樣，寓工作於娛樂。TVB