楊茜堯清爽短髮被指撞樣袁潔瑩 食龍眼上火突然失聲 相隔20年與羅嘉良再合作演複雜師徒.羅嘉良、楊茜堯、張曦雯、滕麗名、陳煒、劉佩玥同何廣沛今日（14日）到深圳出席劇集《模範律師團》開鏡儀式。總監製鍾澍佳透露，兩年前喺TVB台慶頒獎禮上邀請羅嘉良合作，對方聽完故事即答應，今日終於開拍好開心。佢又話要請滕麗名客串好難，因為佢喺《愛·回家之開心速遞》好重要，而家有期就要搶佢正劇嘅「頭啖湯」。剪咗一頭短髮嘅楊茜堯聲沙沙現身，笑指而家從背後睇似男人，聽聲都似男人。何廣沛好開心能夠同羅嘉良合作，話恨咗好多年：「幾年前嘉良哥拍《與諜同謀》嗰陣，我已經逐個問幕後工作人員，可唔可以幫我整個同場戲，但都唔成功，又試過入廠想偷師，但每次都見唔到佢，好可惜。今次好多謝佳導，終於願望達成。」陳煒嘅粉絲更送上飲品為劇組應援，非常有心思。

羅嘉良同楊茜堯受訪時透露劇中係師徒關係，每個角色都有好大挑戰性。羅嘉良大讚楊茜堯嘅角色好複雜好難演，但相信佢一定得。佢話9年前本來有機會喺《與諜同謀》合作，但楊茜堯因合約問題最終唔成事，好期待今次合作。楊茜堯話20幾年前曾經喺《流金歲月》同《衛斯理》同羅嘉良合作過：「我哋喺《衛斯理》做表兄妹，佢成日同我訓話，發表謬論，今次就做師徒，但今次好多法庭戲好多對白，想叫嘉良哥幫我講啲。（最後師徒決裂？）你哋想套我劇情？我只能講師父改變咗我成個人生。」羅嘉良笑謂劇情有好多反轉再反轉嘅地方，又好開心同滕麗名繼《難兄難弟》後、相隔至少30年再合作，今次飾演夫妻，笑指女演員好多，張曦雯同劉佩玥都係佢徒弟，艷福不淺，但現實中就大鑊。

楊茜堯聲沙沙，話冇病，可能前幾日食龍眼上火，突然失聲，已經食咗消炎藥同開聲藥，好彩暫時法庭戲比較少。佢話剪短髮係自己主動提出，鍾澍佳反而想佢長頭髮，但佢覺得個個女演員都長頭髮，所以主動剪短帶出分別。講到短髮撞樣袁潔瑩，佢笑指一樣靚女。問到老公羅子溢會唔會覺得新造型驚喜，佢反指囝囝見到好驚奇咁話「咦，你剪到咁嘅」。佢話：「我個仔好圓滑，我問佢以前好睇定而家好睇，佢話以前靚，而家都靚。老公套劇都差唔多拍完，我開工時到佢湊小朋友，佢都話會嚟探班，想見吓嘉良哥，應該都會帶埋小朋友嚟。」問到陪唔到仔女會唔會愧疚，佢話：「我而家係嚟賺錢，但都有少少，會抽時間陪佢哋。」羅嘉良則透露13歲女兒喺英國讀書，已經可以自己坐飛機，好獨立。另外，羅嘉良同近日相繼離世嘅鍾景輝同陳敏兒都合作過，佢話鍾景輝係令人尊敬嘅前輩，喺演藝界有好大貢獻，希望佢哋一路好走。