19歲姚焯菲穿透視喱士裝拍廣告挑戰性感 搣甩稚嫩晒女人味.「聲夢小花」姚焯菲（Chantel）自從遠赴紐約求學後，每次趁假期返港都帶俾粉絲無限驚喜。現年19歲嘅佢日前趁暑假回港，隨即推出新曲風單曲《想飛之內心獨白》。除咗新曲風轉型，近日佢為拍廣告，破格以高顏值性感打扮現身，瞬間喺網絡掀起熱話。

以往姚焯菲嘅衣著風格多數偏向保守清純少女風，最多都係適逢其會露吓腰或露吓腿。然而，喺最新曝光嘅護膚品廣告中，商品本身似乎已經變成次要，因為大眾嘅焦點全被佢嘅「微醺性感」吸引。佢今次激罕挑戰極具女人味嘅白色喱士裝，最令粉絲震驚嘅係，喺正面宣傳照中，清楚見到Chantel喺精緻嘅Bra Top外面，係全然透視嘅薄紗，令飽滿健康嘅少女身段若隱若現，春光無限。

除咗喺造型上打破框架，未夠20歲嘅姚焯菲喺樂壇輩分上都悄悄「升呢」成為大姐姐。為咗宣傳新歌，Chantel日前特別邀請平均年齡只有14歲嘅新晉女團Honey Punch六位成員，一齊拍片合唱《想飛之內心獨白》。雖然置身於一班骨膠原爆棚嘅後輩當中，但已經歷過唔少大場面洗禮嘅姚焯菲依然青春無敵，無論膚質定少女感都完全不輸，仲多咗一份淡定自若嘅壓台星味。