滕麗名爆丈夫靠「另類方法」追求 每年訂立共同目標保鮮婚姻.藝人滕麗名（阿滕）日前到新城廣播接受《Ben同Benson『Chur』到行》訪問，大談與丈夫相識、相戀至結婚12年來的相處點滴。佢笑言丈夫當年用「另類方法」追求自己，首次約會更遲到45分鐘，反而成功引起佢嘅注意。

阿滕透露，丈夫並非主動出擊型，而係用咗另類追求方法：「如果男仔想識女仔，其中一個方法就係特登唔理佢。」佢指當時朋友在中間推波助瀾，加上丈夫對佢表現出好奇心，慢慢拉近距離。首次約會丈夫遲到45分鐘，仲約佢去日本餐廳食壽司吧，丈夫以塞車解釋，但呢個遲到反而令佢記住對方：「即刻記住佢，即刻好嬲。」之後就開始留意呢個人。

講到維繫12年婚姻，阿滕表示二人每年都會搵新鮮感，年底已經好緊張咁策劃來年大計：「每一年都有一個目標，有一年我哋去冒險，去一啲完全冇去過嘅地方，我去做research，去毛里裘斯。」佢笑言有時甚至一齊買樓，例如喺泰國置業，然後一齊搞裝修：「呢件事令到大家都有個目標，有個慾望，去等到呢一日。」

阿滕更自爆與丈夫設有專屬嘅「外星話」密碼，以防AI詐騙：「我同我老公真係有護照，係九唔搭八嘅密碼，呢個世界冇人會知嘅，除咗我哋兩個。」若要過數匯款，對方必須講出密碼，否則唔會過數。