《中年好聲音4》｜鄭家聲360度空中翻騰震撼全場 奪95分首贏MVP.《保濟丸130週年呈獻：中年好聲音4》昨晚（6月14日）8點翡翠台播出「安歌之夜」下半場，許志安擔任嘉賓評審，「知音人」則有唱作歌手吳國敬、著名時裝設計師馬偉明。「安歌之夜」戰況激烈，一直被視為「黑馬」嘅鄭家聲成功擊倒「大魔王」，全晚賽果如下：雷小雷《想說》86分、尤淑情《二人行 一日後》85分、鄭家聲《翻騰》95分、可嵐《向全世界說愛你》85分、鄭仲豪《昨遲人》92分、吳亦偉《真心真意》89分、范子睿《男人最痛》90分。

鄭家聲早前同「喊包琪」許美琪Rock爆合唱《紅色跑車》，憑出色舞技被網民封為「中4舞王」。今集家聲再下一城，挑戰許志安經典金曲《翻騰》，大晒超強舞功，成功拿下MVP！佢每個舞步與節奏都Perfect Match，氣息穩定，仲接連完成華麗轉身同360度空中翻騰，瞬間引爆全場氣氛！一曲結束後，家聲應主持車婉婉要求，再度使出招牌「跪地拗腰彈起身」，展現驚人腰力。憑藉呢次高水準跳唱表現，五位評審一致畀出19分，家聲以全晚最高95分首贏MVP！

家聲透露舞步主要參考許志安演唱會版本，許志安聽後大為讚賞，話家聲勇於跳出舒適圈，不斷突破自我，更謙稱自己被家聲超越：「我自己Solo都冇咁犀利！你係我畀最高分嘅一個，你肯大膽行出嚟，呢份真心我好感動。」周國豐以「神打」形容家聲演出：「神打得嚟又靚，佢有兩吓轉身好勁，咁準仲要啱Beat！今日嘅家聲係一路走上嚟，你進步嘅速度愈來愈大！」張佳添更激讚家聲演出係《中年好聲音》四季以來最型一次表演！

一直被視為三甲大熱嘅「中4炸彈」尤淑情，選唱《二人行 一日後》意外失準，僅得85分首次跌入待定區。淑情大膽改編歌曲，甫開始以約30秒無伴奏、自己邊「啪手指」邊唱歌，挑戰高音，再以述說感唱腔作結。不過演出未能打動評審，肥媽同張佳添罕有聽到皺眉！海兒直言：「你今日嘅拍子有少少不穩，呢個表演唔係好適合你。」肥媽認為淑情「諗太多」：「我覺得你冇好專心去唱歌，變咗好似『拉牛上樹』咁。」張佳添亦指淑情未能好好發揮輕快節奏，反而暴露弱點。

雷小雷以充滿憂傷及思念之情演繹《想說》，奪86分順利晉級，不過張佳添略嫌佢用太多Vocal Fry（氣泡音），周國豐亦話：「通常靚聲嘅人會用好多喉嚨聲音，因為低音區域好靚，但今日你嘅音色唔係最靚，我哋聽過雷小雷嘅音色係好靚嘅。」

壓軸登場嘅「頭號殺手」范子睿繼續唱慘情歌，七情上面演繹《男人最痛》，奪90分順利晉級。原來比賽當日撞正子睿同老婆結婚9周年紀念日，佢笑言原本想唱《向全世界說愛你》送俾老婆，但因擔心未必適合自己，更爆太太落Order：「你今次唱歌再出問題，我返屋企就毆跛你隻腳！」喺車婉婉提議下，子睿即場唱幾句《向全世界說愛你》送俾到場支持嘅老婆，邊唱邊派心心，冧爆全場！

節目尾聲，評審「退庭商議」，最終選擇於上半場演唱《世紀末煙花》嚴重甩Beat嘅卓猷燕。猷燕感性表示：「我站在很多台上比賽，但在香港……我年紀愈大感情愈濃，多謝你們有用心聽我唱歌，我盡力了。」車婉婉眼濕濕話猷燕對音樂嘅熱誠超乎想像，係一位令人難以忘記嘅選手，場面感人。