飛常日誌II｜周嘉洛首度合體馬國明！秒變「追星迷弟」 戲內外崇拜對方視為目標.《飛常日誌II》今晚（15日）首播，周嘉洛飾演醒目嘅機場見習行政人員程日飛，非常崇拜馬國明飾演嘅師傅楊尚偉，化身「追星迷弟」，相當可愛。劇情講述尚偉升職後，日飛一直想跟埋師傅一齊調去新部門，更自信爆棚咁話：「如果我可以繼續跟師傅，機管局爭住留低我添！」又對吳偉豪飾演嘅關宇安話：「George同我師傅根本唔同級，有咩資格做我阿頭？」安仔就潑冷水：「飛哥你係實習生嚟，麻煩你放低你所謂嘅高傲。」日飛其後向尚偉道出心底話，問師傅點解唔帶埋佢走，但尚偉以「MT為期3年實習期，入嚟唔夠一年就想走，規矩就係規矩」拒絕咗佢。

網民紛紛留言讚周嘉洛角色夠醒目有活力，仲話佢同馬明嘅對手戲好正。今次係周嘉洛首度同馬國明合作，佢接受tvb.com獨家訪問時對對方有讚無彈：「馬明係一個友善又平易近人，相處極度舒服嘅演員，佢對工作嘅態度亦都好專業，所以同佢合作嘅體驗非常好。」佢又話馬明絕對係「愛妻號」：「言談間都會聽到佢成日提起老婆，感覺到佢哋夫妻關係非常甜蜜，真係令人羨慕。」

戲中嘉洛非常崇拜馬明呢位師傅，戲外嘉洛一樣視對方為目標：「我會幻想自己可以成為好似佢咁樣嘅前輩，人緣好、態度好、同任何台前幕後都相處融洽，而且生活簡單得嚟又滋潤，簡直係我嘅目標。」