飛常日誌II｜劉穎鏇化身最美機場主管挑戰4種語言 網民：想錄做鈴聲. 《飛常日誌II》今晚（15日）首播，劉穎鏇（Tiffany）上一輯嘅空姐Look引嚟關注，今輯佢升職做管理層，成為港灣航空駐機場主管，以多套OL套裝亮相，展現溫柔知性風，同樣亮眼。甫出場就著住短打OL套裝，大騷美腿加上甜美笑容，養眼度爆燈。

劇情講述香港國際機場因全球系統失靈陷入混亂，馬國明、高海寧、洪永城、徐榮等全力處理呢場不可抗力嘅事故。馬國明召開緊急會議，劉穎鏇竟然以新任港灣航空駐機場主管身份現身，令眾人感意外。面對一班乘客嘅提問，佢處變不驚，冷靜耐心解答每個疑問，仲挑戰咗4種語言，分別係粵語、英文、日文同國語，每種都講得相當流利。

劉穎鏇早前接受傳媒訪問時話，日文對佢最具挑戰，為咗講好對白，佢特意請朋友錄低日文台詞，自己就不斷反覆聆聽同背誦，仲笑言連同事都聽到耳熟能詳。難怪佢講得咁流暢，相當犀利。一班粉絲大讚Tiffany把聲非常悅耳，笑言想錄低做鈴聲，仲話即使唔係空姐Look一樣咁吸睛。其實劉穎鏇唔係首次挑戰新語言，上一輯佢已經挑戰過土耳其話，展現語言天分。TVB