郭晉安CEO胞姊罕露面 氣質出眾做養生KOL 再晒高超水墨畫技.視帝郭晉安嘅胞姊郭致因近日進駐小紅書，開設個人帳號分享養生日常同精緻嘅水墨畫作，其中唔少作品更曾參與畫展，才華橫溢。作為上市公司執行總裁（CEO）嘅佢雖然已年過六十，但片中悉心打扮、氣質優雅，五官輪廓同笑容同弟弟郭晉安猶如「餅印」，令網民紛紛驚嘆郭家嘅強大基因。

雖然如今貴為商界女強人，但郭致因喺最新發布嘅影片中大方透露兩姊弟嘅成功，全賴童年時嘅基層磨練同父母嘅獨特家訓。郭致因坦言，佢哋出身基層家庭，條件唔好，屋企有九兄弟姊妹，佢排第八，同最細嘅孻仔郭晉安因為年紀相近，自細感情要好。佢回憶道，父母自幼教導佢哋「唔好盲目追求所謂嘅成功」，反而強調「必須學會獨立」，呢份家訓深刻影響咗兩姊弟嘅一生。

因為當時家境清貧、冇零用錢，年幼嘅郭致因同安仔一齊去街市摘芽菜、幫唔識字嘅鄰居讀信代筆，甚至去工廠拎外包手工返屋企做，全靠一雙手賺取微薄嘅零用錢。呢段喺底層共同奮鬥、互相扶持嘅童年點滴，唔止令兩姊弟建立深厚感情，更磨練出極強嘅獨立個性，令佢哋有「不言休」嘅決心。