吳文懿揭因2個蛋撻受盡屈辱 痛定思痛成功搣甩100磅. TVB小花吳文懿憑《正義女神》中飾演少年犯而引起關注。佢從前係肥妹仔一名，高峰期重達210磅，後來痛定思痛，努力減肥成功搣甩100磅，非常犀利。近日，吳文懿拍片公開減肥嘅原因，原來關兩個蛋撻事。

吳文懿透露自己細細個已經係「肥妹」，疫情期間經常留喺屋企，又鍾意食重口味食物，體重一度升至200幾磅。佢話真正令佢決心減肥嘅契機，竟然係一次買蛋撻嘅經歷。佢話當時只想買一個，但收銀員誤會佢要兩個：「我就說我是要一個蛋撻，誰知道他就算了我兩個的價錢。」對方態度好差，仲將蛋撻掟喺枱面，話：「我都夾了兩個給你，你想怎樣？」佢坦言：「那一刻我是完全不敢說話的，一來是因為我自卑，二來是因為後面還有很多人在排隊。」

吳文懿離開後即刻打電話畀媽媽喊訴，感嘆係咪因為自己肥，就會被人欺負、得不到尊重。媽媽當時叫佢「鬧返佢」。佢話：「其實當你看著自己體重增加，看著自己穿不到喜歡穿的衣服，你是真的會自卑的。」佢形容嗰一刻自己突然醒覺：「原來肥是真的影響到我的自信。」

吳文懿抱住「吃完呢兩個蛋撻，就一定要成功減肥」嘅心態，最終成功瘦身。佢話成個人都變得好唔同：「拍照不再害怕，會不會拍到我很肥呢？我也可以勇敢去表達我自己的意見。」佢希望以自身經歷鼓勵大家：「只要你堅持下去，還有你找對的方法，其實已經可以令到你有很大的進步。」TVB