飛常日誌II｜胡敏芝挑戰演聾啞人士 全程零對白1星期速學手語 揭最大難度係呢樣！. 《飛常日誌II》昨晚（15日）首播，首集亮點之一落喺胡敏芝（Karen）身上，佢喺劇中挑戰自我，飾演一位聾啞乘客，全程零對白，極具考驗。劇情講述鍾柔美飾演嘅機場見習行政人員葉舒恩，喺客運大樓隨機邀請旅客填寫問卷，當佢遇上胡敏芝飾演嘅聾啞少女時，對方因無法開口應答而面露難色。但正當葉舒恩誤以為被婉拒、準備轉身離開之際，胡敏芝急忙起身拉住佢，並使用手語同備忘錄表明自己嘅情況，答應幫忙。

另一個場口，機場因系統故障引發混亂，胡敏芝喺人潮中不慎被撞跌，連助聽器都被踩爛，一度徬徨無助，又差點誤機，幸得葉舒恩同飾演機場保安主任陳杰嘅洪永城及時現身，一個拉住佢奔向登機處，一個喺後方幫手拎篋，順利化解危機。

對於今次要挑戰做聾啞人士，胡敏芝接受tvb.com獨家訪問時透露，呢次係佢首次學習手語，即使動作唔多，都相當用心學習：「劇組有請手語老師教我，並根據對白需要拍成短片send畀我練，所以我就係咁loop啲片，學咗一個星期。」講到演出嘅最大難度，胡敏芝直言：「因為係睇片學，所以一開始一直諗緊老師係鏡像示範定係左右調轉嚟做。不過最大難度係零對白嘅限制，我淨係靠表情同隻手去做返個情緒。」唔少觀眾留意到佢嘅進步，話「幾有新鮮感，啲眼神同表情都有傳遞出無助嘅感覺」。另外，有網民留言大讚佢cute爆外表：「紮孖辮根本就係學生妹」、「呢個造型好清純，完全零違和」。