余慕蓮住老人院近況曝光 邵音音黃夏蕙探望滿載溫馨 安德尊豪氣包起所有費用. 88歲資深演員余慕蓮（魚毛姐）近年健康狀況備受關注，曾因耳石症及肺纖維化等病症多次入院，更一度入住ICU半年。近日因為照顧佢多年嘅印傭姐姐返鄉下嫁女，佢暫時搬到老人院居住一個月。日前邵音音、黃夏蕙及資深傳媒人黃庭桄去到老人院探望，其最新近況同居住環境隨之曝光。

從黃庭桄喺社交平台分享嘅圖文所見，余慕蓮入住嘅單人房簡潔舒適，設有一張床同一個儲物櫃，日常會去大堂睇電視，或者同院友打一蚊一鋪麻雀消磨時間。當日邵音音同黃夏蕙專程前往探望，雖然余慕蓮要用輪椅代步，但精神唔錯，三人一聚首即成焦點，吸引唔少院友及家屬上前合照，場面熱鬧又溫馨。

此外，魚毛姐多年來熱心公益，曾經動用退休金喺貴州興建一間小學，仲計劃將自己嘅住所喺百年歸老之後送俾慈善機構，賣樓所得全數作慈善用途。據悉其老人院住宿費用亦由安德尊幫忙承擔，盡顯圈中情誼。