▪️佛得角未「罰德國」，不過就先懲罰傲慢嘅西班牙！呢支神奇之師QF一度力壓非洲雄獅喀麥隆直接晉級決賽週，只係名氣遠遠不如王者西班牙而被睇低幾線。40歲嘅佛得角門將禾辛夏（Josimar Dias Vozinha）全場作出7次成功封阻，喺對手19次攻門之下依然力保不失，賽後獲選全場最佳之外，人氣急升由原來嘅20K變到4.5M！更有傳唔少大會希望將呢位自由身嘅龍門收歸旗下。但係呢位國家英雄風光背後嘅係佢祖父母過世已無法見證，母親亦因簽證費用問題而缺席。

西班牙全場「撳」住對手來砌，但係全隊最活躍表現最好嘅只有啱啱轉會皇家馬德里嘅左閘古卻利拿（Marc Cucurella）。相反推上一格嘅加維（Pablo Martín Páez Gavira）、柏迪（Pedri）、奧耶沙保（Mikel Oyarzabal）等都相對較爲平庸，費蘭托利斯（Ferrán Torres）更加可能浪費咗全場最好嘅兩次機會，包括一次中楣。尼高威廉士（Nico Williams）同萬眾期待嘅耶瑪（Lamine Yamal）雖然先後喺下半場入替，但係都表現平平。西班牙喺應付陣地戰方面嘅能力以及把握能力，睇來都有待提高。

▪️壽星公沙拿（Mohamed Salah）今日主力兼以隊長身分登場，除咗貢獻一次助攻，表現就唔及幾位隊友搶眼。埃及早段進攻，令比利時要倚靠犯規來中斷。幾位攻擊端嘅球員馬莫殊（Omar Marmoush）、薛高（Mostafa Zico）、艾素亞（Emam Ashour）都相當出色，尤以後者秤先，佢亦都射入一個相當精彩嘅入球。

比賽嘅節奏明快，球迷都非常過癮。杜古少咗單打獨鬥嘅機會，反而迪布尼多咗起腳攻門，罰球中柱係最為可惜。迪卡特萊爾喺中前場嘅支點作用都做得幾好，而入替佢嘅盧卡古搶位就令對手擺烏龍。迪古柏（Maxim De Cuyper）最後時刻嘅頭槌幾乎可以完成絕殺，嚇出埃及球員唔少冷汗。

▪️效力蘇超球會麥瑟韋爾嘅26歲紐中混血兒伊利亞祖斯（Elijah Just）搶曬隊友基斯活特（Chris Wood）風頭，佢嘅梅開二度亦差些少幫助紐西蘭取得世界盃史上嘅第一場勝仗！

伊朗受到外在因素影響（與烏拉圭一樣，比賽後即刻被美國要求離境），加上「最強存在」艾斯蒙因ZZ問題被驅逐出國家隊，實力可以話大打折扣，此戰雖然能守和。不過接落來佢哋要面對實力高過自己嘅比利時以及埃及，好難寄望佢哋能夠突破重圍。右閘利沙爾安（Ramin Rezaeian）相信係今仗表現最好嘅一位。

▪️烏拉圭有唔少左路選擇，不過就係無搵到最好嘅配搭，麥斯艾拿奧祖（Maximiliano Araujo）其實係一位能力相當好嘅左路球員。達雲紐尼斯（Darwin Nuñez）比較低迷，反而芬拿斯（Federico Viñas）嘅捕位同門前觸覺都唔錯。簡奴比奧（Agustín Canobbio）同拜仁洛迪古斯（Brian Rodríguez）狀態唔錯，都值得多啲出場時間。

由 442 轉做 541 ，下半場沙地阿拉伯用轉陣同換人加強活力同防守抵禦能力，不過進攻就越嚟越乏力。喺沙地次級聯賽搵食嘅守門員艾奧維斯（Mohammed Al-Owais）睇落手法唔係好正宗，有啲撲救動作比較奇怪，不過都作出 9 次救波。世界盃分組賽賽事賽果-Group G比利時🇧🇪1-1 🇪🇬埃及伊朗🇮🇷2-2 🇳🇿紐西蘭

Group H西班牙🇪🇸0-0 🇨🇻佛得角沙地阿拉伯🇸🇦1-1 🇺🇾烏拉圭

*附上分組賽G、H組積分榜排名// 沙拿HPBD🎂

FIFA World Cup 2026 🇺🇸🇨🇦🇲🇽世界盃分組賽同日四戰全和