無綫6.22重播《甜孫爺爺》 懷念已故「戲劇大師」鍾景輝.一代「戲劇大師」鍾景輝（King Sir）早前喺屋企瞓覺嘅時候安詳離世，享年89歲。King Sir同無綫嘅淵源好深，由開台之初已經開始，佢唔單止一手創辦「無綫電視藝員訓練班」，仲親自擔任導師，培育出一代又一代嘅巨星。同時，佢亦落力參與幕前演出，參演過多套無綫經典劇集，好似《甜孫爺爺》、《高朋滿座》、《律政強人》等，角色無論係正經定搞笑，佢都演得游刃有餘，無負大師嘅美名。

為咗等觀眾可以重溫大師嘅風采，TVB Plus（82台）將會喺下星期一（6月22日）起，逢禮拜一、五晚10點半，同禮拜二、四晚10點35分，重播King Sir主演、共20集嘅溫情劇《甜孫爺爺》。劇中佢飾演一個七十幾歲、退休嘅中學校長文泰來，喺屋企唔單止係一家之主，仲係孫仔口中嘅「太上皇」。同場演出嘅演員仲有夏雨、陳秀珠、劉愷威、方力申等。