港姐2026｜候補陳梓穎不覺學歷輸蝕 開心被讚似郭柏妍：我嘅榮幸.《2026香港小姐競選》12位候選佳麗經過髮型大改造後，今日（17日）喺TVB電視城正式首晤傳媒。原先入圍嘅大熱佳麗吳倬希前一晚因私人理由退選，由去年底奪得《多倫多華裔小姐競選》季軍嘅陳梓穎（Cecilia）補上。

現年24歲嘅陳梓穎喺多倫多一間金融公司擔任行政助理，對於「失而復得」，佢接受《香港01》訪問時透露，早前從工作人員口中得知已通知所有入圍佳麗，但自己遲遲未收到通知，以為已經落選，於是失落喺小紅書發文。點知原來係一場美麗嘅烏龍：「工作人員一直打我香港電話，但電話唔知點解一直打唔通。直到尋日佢哋打我加拿大電話，我先收到通知！」佢笑言，有過之前首次面試時將通知當成詐騙電話嘅經驗後，而家咩電話都會聽。自覺有運嘅佢，得知喜訊後第一時間通知媽媽，兩人都好開心興奮，但隨即感到緊張，直言其他佳麗都好優秀，自己要加把勁。問到介唔介意被指「執二攤」，佢大方話：「唔會嘅，睇你點樣睇，可以入選已經好榮幸。」

被問到學歷喺12位佳麗中相對較低，會唔會擔心有影響，陳梓穎淡定回應：「每個人都有自己嘅特長，學歷呢方面我比唔上佢哋，但我有選美經驗，可以喺呢方面幫到佢哋。」佢透露試衫時被要求減肥，目標再減3公斤，特別係腰部線條，務求最佳狀態着比堅尼。對於網民覺得佢似師姐郭柏妍，陳梓穎趁機賣口乖：「呢個係我嘅榮幸！我有睇佢好多劇集，包括而家嘅《飛常日誌II》。我自己都覺得眼睛同笑起嚟嘅時候有啲似。（會唔會有壓力？）我會努力加油，希望配得上呢個女神郭柏妍嘅稱號！」問到會唔擔心參選期間被爆黑材料，佢笑笑口話：「咁就要睇你哋媒體係咪真係搵到啦，搵到再講啦！」對自己信心十足。