▪️美國連續兩屆決賽週晉級淘汰賽階段，打破咗隊史紀錄。佢哋喺比賽初段嘅攻勢，令澳大利亞防線相當吃力，柏比（Ricardo Pepi）就利用左路傳中波導致貝基斯（Cameron Burgess）自擺烏龍。費文（Alex Freeman）嘅入球失而復得，要多謝VAR嘅幫助。美國喺下半場依然有唔少擴大比數嘅機會，但係就未能把握。不過兩場全勝六分全取，繼墨西哥之後成為第二支晉級嘅球隊。

澳大利亞延續首戰嘅541陣式，獨伊蘭昆達被收起令人費解。半場反擊亦都欠缺效率同速度，呢個喺佢下半場上陣之後有明顯嘅分野。而美國喺下半場面對佢哋嘅反擊需要依靠犯規動作先可以暫停同阻延，相信其他球隊都會以此為鑑。

▪️沙巴利（Ismael Saibari）開波69秒嘅入波，成為摩洛哥歷來世界盃決賽週最快嘅入球，並且係摩洛哥歷來第一位球員喺頭兩場世界盃分組賽都有入波，佢哋上半場能夠成功通過搓傳去控制局面。

蘇格蘭上半場用泰爾尼（Kieran Tierney）去凍結艾舒拉夫（Achraf Hakimi），下半場都用咗好多唔同嘅辦法去進攻，不過有威脅力嘅球員始終都係得幾位。

▪️昆夏（Matheus Cunha）應該講係目前安察洛堤手下呢套巴西陣容裡面捕捉機會最好嘅一位；杜格拉斯山度士（Douglas Santos）上半場早段製造對方黃牌，下半場就侵犯對方攞番張黃牌；拉芬拿（Raphael Dias Belloli）嘅傷出情況令人擔憂，希望唔係大問題。巴西下半場收住踢，先後換入馬田利尼（Gabriel Martinelli）、恩迪克（Endrick Felipe Moreira de Sousa）同艾達臣（Éderson José dos Santos），各自都有一次良機但係係越位在先或者錯失。另外，盧卡斯柏基達（Lucas Paquetá）嘅助攻相當靚。

海地喺下半場逐漸攞返唔少攻勢，36歲效力厄瓜多爾球會基多體育大學嘅艾比（Ricardo Ade）頭槌攻門係最有威脅嘅一次，可惜被艾利臣碧卡（Alisson Becker）托走。

▪️巴拉圭同土耳其首仗都以失敗告終，今場直接對碰當然係許勝不許敗。巴拉圭一改陣式踢4231，就馬上收到唔錯嘅效果，加拉沙（Matías Galarza）喺開場64秒嘅入波，成為今屆賽事至今嘅最快入球紀錄。但係中場艾美朗（Miguel Almirón）喺中場結束前就犯下彌天大錯，觸犯今屆比賽新定嘅五條新例之一，摁嘴講嘢直接被紅牌驅逐出場，令原本場面唔佔優嘅巴拉圭要踢少一個先返更衣室。下半場全面挨打之下能夠苦守不失，除咗多謝班隊友還有運氣嘅加持。

至於土耳其抵唔抵輸，數據顯示佢哋喺分組頭兩場賽事合計共有62次攻門紀錄，但係就顆粒無收，呢個就係促使佢哋被淘汰出局嘅主要原因。但係後備入替嘅前鋒居爾（Deniz Gül）就浪費兩次黃金機會；而中堅丹美路（Merih Demiral）最後一擊頭槌貼柱而出之後，似乎運氣都唔喺佢哋呢一邊。球隊成為繼海地之後，第二支篤定出局嘅球隊。

世界盃分組賽事賽果-Group C蘇格蘭🏴󠁧󠁢󠁳󠁣󠁴󠁿0-1 🇲🇦摩洛哥巴西🇧🇷3-0 🇭🇹海地

Group D美國🇺🇸2-0 🇦🇺澳大利亞土耳其🇹🇷0-1 🇵🇾巴拉圭

*附上C、D分組積分排名

FIFA World Cup 2026 🇺🇸🇨🇦🇲🇽世界盃分組賽世界杯