吳若希捲置業風波強調冇被賣豬仔　一波未平又自爆慘「中伏」.藝人吳若希（Jinny）、周嘉洛、陳楨怡、王嘉慧、李芷晴，以及曾展望（GM）與女友葉蒨文（Sophie），今早（12日）一同出席慈善步行活動，向公眾宣揚眼睛護理的重要性。

以活動大使身份現身的Jinny笑稱，自己平日愛看靚仔靚女，去旅行又鍾意欣賞風景，所以眼睛健康對自己來講格外重要。本身只有輕微近視的她透露，媽媽在她小時候就教識佢用穴位按摩護眼：「唔單止護眼，頭痛都可以按，好舒服。（有無傳畀下一代？）有呀，我都有教小朋友。」

談到而家人人電子產品不離手，Jinny坦言自己對仔女用電子產品的時間有嚴格設限，就算睇書都要喺燈光充足的環境下進行，最緊要適時俾雙眼休息。她又表示，平日會盡量抽時間帶仔女去戶外接觸大自然，俾佢哋充足的運動時間：「我哋成日會去屋企後面座山行下，睇多啲綠色嘢對眼睛好有益。」

近期備受關注的置業風波，Jinny亦首度開腔回應。她指早前宣布在珠海買樓，是有位定居當地的圈中好友向佢推介，自己實地睇過之後非常鍾意：「真係覺得幾好，無論坐向同價錢都好合心意，對我嚟講係舒服得來又冇負擔嘅價錢。」向來心急的她笑言，平時購物睇中就買，就連今次買樓，前前後後都只係考慮了30分鐘就落定。

除了買樓決策，新居的裝修事宜都由Jinny全權跟進，她透露裝修工程已經開工，但因為工作太忙，暫時仲未有時間去現場監工，希望下星期可以抽空去睇下進度。自稱「新進裝修KOL」的她，更自爆一開始就已經「中伏」，坦言因為自己大意，新居有幾個位置選錯了不合心水的物料，笑稱稍後會拍片同大家分享呢次「中伏」經歷。

Jinny表示，原先單位本身附設基本裝修，考慮到內地物價同人工都比香港便宜，在自己可負擔的情況下，就決定斥資做全屋大裝修。她又強調，今次裝修完全冇找贊助，笑稱如果最後效果真係不合心意，都可以毫無顧慮「照鬧」。被問到將來會唔會喺其他城市置業，她笑言會繼續努力，今次揀呢個區，全因為往返香港車程唔使太耐，加上老爺奶奶的工廠都設喺附近，環境同配套都好滿意，所以覺得好適合。

至於有網民發現，她買的其實是中山而非珠海的物業，Jinny強調自己完全冇被「賣豬仔」，叫大家唔使擔心。她坦言就算係唔同區、唔同省都好，最緊要位置合自己心意，而家好期待裝修完成後的成品。被問到裝修係唔係全由佢話事，她笑指老公全程「零意見」，仲多謝老爺奶奶有份贊助今次置業，而物業係寫佢個名。

另外，提到下午即將舉行的粉絲聚會，Jinny好感激粉絲一直不離不棄的支持，又大讚粉絲好有心，會主動提醒佢係時候開見面會。她坦言平日出席活動，大家只能同佢匆匆見一面，開粉絲見面會就可以同大家有更深入的交流。被問到有無預備驚喜環節，她指經理人「逼」佢要正經地做3分鐘致詞，笑稱要佢正經簡直係想「逼死佢」：「講真，我覺得我做唔到，因為我根本認真唔到，我希望經過今次見面會，可以畀大家睇到我開棟篤笑嘅一面！」

她又透露，早前專程去捧戴祖儀場，欣賞對方的首次舞台劇獨腳戲，大讚對方好厲害、做得好好：「一個人可以記到差不多兩個鐘嘅台詞，對我嚟講真係好難嘅事，但我去完發現佢個場地大細啱啱好，好適合我開棟篤笑。」

同場的陳楨怡與王嘉慧一齊接受訪問，二人表示平日都有做運動，但笑言好少戶外活動，通常都係喺室內嘆住冷氣做Gym。陳楨怡透露，平日會帶自己的狗狗去健身室慢跑，被問到為何不順道帶狗狗去街上散步，她笑指自己冇方向感，好容易會蕩失路，睇住地圖跑又會變得不專心，都係躲喺室內比較安全。

王嘉慧就表示自己鍾意留在家做運動，提到她早前喺社交網分享在家中做高難度健身的短片，片中佢喺客廳「堅離地」做運動，借助餐桌同行李篋的滾輪，一口氣做出多個平板支撐動作，結果被網民狠批危險、教壞人。王嘉慧對此回應：「因為條片本身原意唔係教做運動，純粹係For fun，但可能拍片嘅時候冇諗得咁詳細，下次拍片一定會小心啲。」她表示做之前都有衡量過自己的能力能不能做到，亦有強調危險動作切勿模仿，不過可能呈現出來的效果的確危險了少少，所以後來已經收回了那條片。她又指唔介意被網民批評，因為明白大家的出發點係擔心佢的安全，好多謝大家的關心。被問到二人會唔會想找個猛男陪做運動會更安全，她們笑指唔使擔心，互相陪住對方做運動就夠。另外提到有指無綫將強制接管旗下藝人社交帳號一事，二人表示公司仲未同佢哋傾過呢件事，到時再作打算。

至於曾展望（GM）同女友葉蒨文（Sophie），就開心表示呢次係佢哋首次一齊參與戶外活動。佢哋指平日拍拖多數都係逛街、做健身同食消夜，笑言亦因此變得「幸福肥」。GM話：「我覺得自己係時候開始修身，迎接夏天。」Sophie就認為自己體重適中，著泳裝都冇問題，但笑指男友唔捨得佢「被睇蝕」，夏天或者要考慮著潛水衣出街先得。

提到Sophie早前被網友批評眼睛「怪怪的」、不自然，更因此即時反擊網民，她表示事件完全冇影響到自己的心情，認為最緊要懂得欣賞自己：「我好鍾意自己對眼，作為演員，可以透過對眼表達情感。」GM亦全力力撐女友：「我簡直畀佢電親，否則唔會揀佢做女朋友。」

Sophie坦言，希望透過自己的經歷做示範，鼓勵大眾學識處理網絡欺凌問題：「人哋講難聽說話，唔使太上心、唔使問候對方、亦唔使畏懼，可以去講道理，表達自己的感受，唔需要害怕。」她指近來喺社交網同粉絲玩「你問我答」互動，幫助了不少粉絲解決不開心的事，覺得好有意義。她又透露，近日已經報讀了輔導課程，想開拓成為「人生導師」的路，坦言而家人工智能盛行，演藝市道萎縮，所以希望增值自己，學多一種技能，為未知的將來做準備。TVB