金像奖专访丨廖子妤默默耕耘終成影后大熱 自喻養成系：陰啲陰啲儲落觀眾緣

廖子妤獨自從馬來西亞來港發展接近20年，喺冇背景、冇人脈嘅情況下，喺演藝路上默默打拼。由一開始只想整靚個profile、煲大自己個名再返馬來西亞，冇諗過被導演何康揀中拍攝人生第一部電影《末日派對》，從此開展咗佢嘅戲劇之路。舊年，4部由佢主演嘅電影先後上映，佢憑《像我這樣的愛情》首度入圍金像影后。佢笑言一切就好似命運安排，喺佢一步步行緊自己條路嘅時候，上天突然推佢一把，將佢擺喺觀眾眼前。佢話自己從來唔係一炮而紅，一切都係累積返嚟，更認為自己係「養成系」，由青澀變成熟嘅過程，觀眾一一睇在眼內。

第44屆香港電影金像獎將於今晚喺香港文化中心舉行，廖子妤憑《像我這樣的愛情》中嘅破格演繹，首次獲得「最佳女主角」提名，同《水餃皇后》嘅馬麗、《無名指》嘅許恩怡、《醬園弄‧懸案》嘅章子怡及《贖夢》嘅陳法拉爭奪影后寶座。佢之前已經喺香港電影評論學會及導演會年度頒獎禮中封后，被視為金像影后大熱人選。

廖子妤坦言好想再下一城：「當然會想攞埋金像獎，每個演員都想自己嘅表現得到觀眾同評委嘅認可。獎項唔係我演戲嘅目標，我係為咗體驗人生，我係真係鍾意做戲，獎項只係一個bonus。獎項好需要天時地利人和配合，係多重因素疊加嘅結果。」

廖子妤認為而家一切嘅嘢都係上天俾佢嘅，笑話都有諗過點解係呢個時候：「早幾年睇過網上評論話我星路平平，但我唔覺得係懷才不遇，因為呢幾年一路都有人搵我拍戲，雖然未必套套做女主角，又或者好多空間俾我發揮，但都叫有人搵，唔覺得自己特別運滯。反而初初嚟香港嘅時候的確唔係經常有戲拍，搵錢方面冇而家咁好。我做女主角嘅作品舊年一次過上映，好似係命運安排，將我好似上菜咁擺喺觀眾眼前。我唔係一炮而紅，係陰啲陰啲儲落一班知道我嘅觀眾。留意開我嘅觀眾可能會有種老懷安慰嘅感覺，仲會有養成系嘅感覺：『呢個女終於都有人見到喇。』」

廖子妤喺2012年獨自嚟香港發展，佢話當時從冇諗過會有今日嘅成績，坦言一開始只想嚟香港打個轉，整靚個profile就返馬來西亞：「原來我喺香港做咗好多嘢，比起當年嘅預期或幻想得到更多。我一開始嘅如意算盤係嚟香港打個轉，整靚個profile，返馬來西亞時就可以煲大自己，同人講拍過好多雜誌。當時從冇諗過可以喺香港拍戲，因為我嚟香港係做模特兒，但其實我喺馬來西亞都有拍戲，2009年入行拍第一部電視劇，做咗4年都係做特約。」

一個女仔嚟到一個陌生嘅地方，冇朋友、冇親戚、冇人脈仍然可以走到今時今日，廖子妤除咗感恩上天安排，亦多謝第一個簽佢嚟香港嘅人：「當初係Jam Cast嘅Juana Li簽我返嚟，好多謝佢。我將自己嘅profile send去亞洲唔同地方，大部分都係多謝嘅來信，更多嘅係石沉大海，有啲見我只有167cm就拒絕，但Jam Cast簽咗我返嚟，為我提供入行第一個踏腳石。」

除咗Juana Li，廖子妤話每一個時期都有唔同嘅恩人同伯樂，好似第一部戲《末日派對》嘅監製泰迪羅賓同導演何康、《骨妹》導演徐欣羨、《梅艷芳》導演梁樂民等等。近年最感謝嘅就係安樂電影嘅老闆江志強：「江老闆喺拍《梅艷芳》時就肯用我哋呢一班比較新嘅演員，之後嘅電影都係類似嘅班底，最新嘅《寒戰1994》都有好多熟悉嘅臉孔。可能觀眾會覺得悶，但呢個做法同時會推到一班人出嚟，用到叫做有人認識、叫做有啲出頭。」

廖子妤喺2024年公開受疾病纏身兩年，而家情況已經越來越好，笑言患病期間最大嘅體會係「有病就要醫」：「身體無事才可以做冠軍。」佢話：「以前好鍾意亂諗嘢，但又唔會去處理，嗰段時間好無助，心理影響生理再影響心理。性格上嘅缺憾會影響處事方式，以前唔識處理壓力，只會擺埋一邊，冇一個適合嘅發洩方法。」

「近年就開始用行動改變，多曬太陽、睇中醫、調理身體，再有一啲思想上嘅改變。呢兩年開始體會到要接受自己，呢個係轉念嘅開始。以前最大嘅拉扯係我唔接受自己，我知道自己好多缺點，係一個好脆弱嘅人，好易緊張，又好有控制欲。如果事情不如我想像中發展就會好緊張，但我不接受呢個我，唔去承認自己有呢個部分。近年發現要接受呢個就係我，我根本唔係咁有型，唔型又so what？要包容自己不完美嘅部分，要知道好多事都唔係自己能控制，而家少咗亂諗嘢。」

佢又話舊年畀咗自己一個目標，就係學揸車，已經考咗車牌：「喺學車同揸車嘅過程中學到好多道理，揸車時唔好理旁邊嘅車嘅速度，行好自己嘅節奏。」

講到男友盧鎮業都有車牌，廖子妤即「生氣」表示佢做乘客時會經常吵架：「尋日先吵完。我唔係想話自己揸車叻啲，而係大家都識揸車，只不過有啲方法唔同。行錯路就行錯路，地球係圓嘅，香港好細，最多咪遲少少，我又唔趕時間。我揸車唔係代步，而係放鬆同排解壓力嘅方法，所以我鍾意揸車。」