金像獎2026｜連詩雅澄清冇黑面 自嘲交戲有層次：由內到外再到返內.《第44屆香港電影金像獎》日前圓滿結束，台上獎項塵埃落定，台下嘅Kiss Cam環節同樣成為焦點。當鏡頭對準金像女神廖子妤同陳家樂時，坐喺旁邊嘅陳太連詩雅（Shiga）被捕捉到「一秒黑面」，即時引爆全網熱議。連詩雅今日（24號）現身電視城出席無綫節目《夫妻肺片》宣傳活動，接受訪問時大方回應呢單「黑面風波」。

佢笑稱自己當時絕對冇黑面，反而係努力緊「演戲」：「其實大家睇返張相，我係微笑緊㗎，只不過我當時係諗緊，應該點樣去演繹呢個劇本。同埋其實大家都大概預知會有呢個環節，純粹係為咗現場氣氛搞吓笑啫。」Shiga仲鬼馬咁話，自己曾經想表現得更「入戲」：「我嘗試想表現一個好明顯係講緊笑嘅黑面，但其實又好似覺得有少少黑面，由內心到外在再到返內心……哎呀，好深層次呀！可惜個鏡頭得幾秒，我做唔到嗰個層次，下次我會好好檢討吓！」

對於被指「小器」，連詩雅坦言有睇過新聞標題，但見到下面嘅留言時覺得好暖心：「我見到大部分留言都知係講笑，甚至有好多人直頭話：『佢根本係笑緊喎』。」佢強調現場所有嘉賓都知道係為咗營造氣氛，而佢同老公陳家樂以及好友廖子妤私下感情極好，絕對唔會因為一個Kiss Cam鏡頭而動真氣。