流浪隊長泰華尼亞（James Tavernier）宣布將於季後離開球隊，結束長達11年嘅流浪球員生涯。👋

出生於紐卡素青年軍，可惜苦無上陣機會，輾轉被外借到各支低組別球隊後，喺2014年轉投韋根，僅效力一季便轉到當時仍喺蘇冠嘅流浪，首場正式比賽即以一記靚罰球取得加盟第一球，當季成功協助流浪升班蘇超。

佢自2018年起開始擔任流浪隊長一職，經歷過如謝拉特、雲邦賀斯等多位領隊都能獲得信任，亦隨隊奪得過一次蘇超，兩次蘇格蘭足總盃冠軍，亦曾打入歐霸杯決賽，成績斐然，個人方面喺2020/21球季贏得由球員之間互相選出嘅球季最佳球員，2024年3月30日對喜伯年嘅聯賽入球更令此子成為英國足球史上取得最多入球嘅後衛。

可惜歲月無情，泰華尼亞上季開始逐漸失去必然正選嘅位置，自季初丹尼路爾（Danny Rohl）上任之後，德國教頭更偏好起用史端寧（Dujon Sterling）出任正選右閘，今季史端寧喺防守端嘅表現的確比佢更可靠，而球會亦著手準備於夏天購入新的嘅右閘。

即使如此，泰華尼亞此刻離開流浪亦都無憾，贏過一切大細錦標及個人榮譽，來到職業生涯尾聲亦需要為自己未來著想爭取最後一張大約，同時都可以激勵隊友搏盡來為隊長離開前贏得蘇超冠軍作為送別。

蘇超 JamesTavernier 🔵⚪️🔴