陳瀅火辣勁舞點燃澳門 獲張曦雯羅毓儀燈牌應援 蔡潔借歌致敬偶像張學友.兩大女神陳瀅同蔡潔擔任主角嘅限定現場演出《Pillow Talk》，昨晚（26日）於澳門銀河G Box圓滿落幕。兩人施展渾身解數，將苦練多時嘅歌藝與舞技一一派上用場，更喺舞台回顧入行超過十年以來不為人知嘅甘苦點滴，深情對話令人動容。整晚兩大女神又源源不絕發放粉絲福利，握手、玩遊戲之外，演出完結後仲留喺台上同粉絲合照，幸福感與滿足度雙雙爆燈。

陳瀅同蔡潔以《下一站天后》揭開序幕，隨即坐上時光機，喺台上重演當年兩人為劇集《女人俱樂部》面試嘅情境。陳瀅剖白入行初衷：「婆婆由朝到晚都睇緊TVB劇，所以我有一個小小心願，如果有一日婆婆喺溫哥華嘅電視屏幕面前，見到孫女演一套劇，我諗佢會為我而驕傲！」結果陳瀅成功入圍正式出道，而蔡潔雖然同該劇擦身而過，但憑住對理想嘅執著與堅持，終能成為出色藝人。佢話：「由細到大我哋好鍾意睇戲，好似《鐵達尼號》，我覺得點解會有咁好嘅作品可以影響全世界嘅人？無論做演員又好、寫稿都好，我都好希望有一日做到啲咁好嘅作品！」

入行以來，陳瀅同蔡潔一直專攻演戲，近年嘗試挑戰唱歌，但要擔正大旗開騷難免緊張。經過連月秘密練兵，兩人明顯大有進步。着住火辣性感舞衣嘅陳瀅，勁舞引爆熾熱氣氛，惹得全場觀眾激情吶喊。唱到《喧嘩》時，張曦雯同羅毓儀更即興開腔驚喜合唱。陳瀅搞笑話：「原來跳唱歌手係好口渴！我而家知道開騷最大嘅挑戰係飲水同抖氣，綵排時候當然有好多時間慢慢飲，但正式又跳又唱，好需要回氣，今次攞到好好嘅經驗。」

蔡潔就精心挑選一系列動聽慢歌，當中更暗藏密碼向偶像致敬。佢剖白心聲：「唱《奇洛李維斯回信》，我特登改咗少少歌詞，第一句我唱咗『J先生』，大家都知道我係張學友（Jacky）嘅粉絲，每次佢唱其中一首歌，我都會忍唔住喊！」蔡潔隨即唱出令佢落淚嘅《等你等到我心痛》，難得今次不但冇喊，仲發揮超水準。而陳瀅提到媽媽遠道坐14個鐘頭飛機去澳門捧場，都居然保持到鎮定。蔡潔笑言：「我以為呢一Part陳瀅會喊，但我諗我哋真係好專注流程，同埋好希望自己喺最好嘅狀態唱歌畀大家聽。」反而張曦雯、王敏奕、劉佩玥等姊妹相繼淚腺失守，個個被陳瀅同蔡潔嘅真情同努力感動到喊成淚人。

兩大女神獻出舞台第一次，吸引香港、澳門、內地以至馬來西亞粉絲到場支持。當演繹壓軸歌曲《信者得愛》時，全場陷入瘋狂狀態，觀眾站立邊跳邊合唱。問到今次反應咁熱烈，會唔會期望移師香港甚至做巡迴演出？陳瀅同蔡潔異口同聲話：「我哋都係有求必應，而且一收到指示，必定會盡全力配合！」

TVB