拒絕黑八！

半場時曾想過轉台睇騎士對速龍，最終決定睇埋第三節先算，結果一度落後24分嘅活塞上演絕地反擊，下半場打出令人窒息嘅防守，逼到魔術連炒23球，到完場前兩分幾鐘，先由班捷奴（Paolo Banchero）入樽射入第一球，活塞終以93:79作客贏波，令比賽返到主場，周日再打搶七戰。

呢個系列賽難以估計，原因係大家嘅三分都唔穩定，但下半場出現紐約力搏贏鷹隊式嘅大屠殺，就難以預計；呢一場活塞有點當年76人嘅感覺，根寧咸（Cade Cunningham）同夏理士（Tobias Harris）嘅組合，就似艾佛遜（Allen Iverson）同伊古奧達拿（Andre Iguodala），前者攻入全場最高嘅32分，後者則有22分及10籃板。夏理士雖無助攻，但佢幫手分波轉邊都有極大功勞，亦令Cade減輕唔少壓力。

其他活塞球員就專心做好防守，杜倫（Jalen Duren）守好籃底，湯臣（Ausar Thompson）就滿場飛幾乎干擾或封阻咗魔術每次出手，前者8分9籃板，後者4分10籃板6助攻4封波1偷波，係魔術下半場死火嘅其中一個原因。鄧肯羅賓遜（Duncan Robinson）就提供咗活塞最需要嘅外圍火力，三分射9中4有14分，末段嘅三分波價值連城。

魔術下半場足足近14分鐘未有射入籃，整體命中係37射4中，三分係18中2；第四節射20中1，結果就係整個下半場只得19分，成為季後賽最低得分；第一時間唸起1998年總決賽公牛狂勝爵士嘅第三戰，睇完比數，先發現爵士當日下半場都有23分，可見魔術今日輸得有幾慘。

活塞任務當然未完，要返主場關門，可預期雙方會更努力防守，比數可能比今場更低，甚至出現絕殺場面；魔術整季都受傷兵困擾，華拿（Franz Wagner）又喺生死關頭傷出，目前仍未知小腿傷而缺陣嘅佢能否復出，魔術今場被打到信心崩潰，莫斯利（Jamahl Mosley）如何令子弟兵重拾信心，至為關鍵。

文章擇自- 仙道彬手記🏀