曼城反客為主，除咗搶分之外重要搶更多嘅得失球。杜古入靚波幫助佢哋領先上半場，比利時邊鋒更加喺今場賽事左右腳各貢獻一腳世界波令球隊處於不敗之地，但係後場嘅甩漏係佢哋未能夠全取三分嘅致命因素。先有古希回傳送禮，再有古辛諾夫出腳未完全封堵對方射門變成助攻+包咗越位位置，使得今仗過後佢哋嘅爭冠形勢變到比較被動。

愛華頓方面上下半場嘅表現完全兩回事，後備入替嘅泰亞奴巴里（Thierno Barry）喺下半場梅開二度；右閘積奧拜恩（Jake O'Brien）雖然搞唔掂杜古，但係反擊方面就「高人一等」，頂入一波，「拖肥」依然有望爭取歐洲賽事資格。

哥迪奧拿賽後表態：「爭標從來都冇掌握過喺我哋手裡面，而家係以前都係。咁還有比賽要踢（剩餘4場），咪睇下到時會點囉。」

肩負歐羅巴聯賽任務嘅森林，出咗唔少副選應戰車路士，效果依然唔錯。車路士要去到補時階段先成功破蛋，近六場聯賽全部輸波，入1球失14球，球隊問題都幾多。相反森林近七場不敗兼取得三連勝，對比都幾鮮明。

英超第35週賽事賽果-列斯聯3-1 般尼賓福特3-0 韋斯咸紐卡素3-1 白禮頓狼隊1-1 辛德蘭阿仙奴3-0 富咸般尼茅夫3-0 水晶宮曼聯3-2 利物浦阿士東維拉1-2 托定咸熱刺車路士1-3 諾定咸森林愛華頓3-3 曼城

EPL諾定咸森林愛華頓 🏴󠁧󠁢󠁥󠁮󠁧󠁿