【On.cc】譚詠麟紅館騷前傳遇車禍親報平安　談大仔會否捧場大賣關子

「樂壇校長」譚詠麟（阿倫）相隔11年將於9月11日至15日及18日至22日再踏紅館舉行共10場《譚詠麟與您「刻骨銘心」世界巡迴演唱會-終極篇》演唱會。今日（29日）舉行記者會公布詳情，大會送上《阿倫日報》作為紀念，還準備幾萬份在不同地點派發，內容全是他入行58年的威水事迹及演藝生涯，還宣布於8月23日他76歲生日時，其個唱pop up store開幕，屆時他將出席剪綵儀式，會上還首播新歌《我在意》MV。

阿倫在台上表示險遇車禍的驚險事，消息在網上瘋傳，現向粉絲報平安。他接受訪問時稱為近日為個唱跑步練氣，只是家中的跑步機壞了，惟有改跑寓所附近的半山跑步徑：「有日有架電車駛過，因為電車無聲，畀佢嚇一嚇，只係揩過，冇事，我都繼續有跑街，（你曾中過暑，一個人跑街唔怕危險？）唔怕，唔使人陪，因為我練步時間唔定時，等新跑步機返嚟就喺屋企跑。」

談及今次個唱稱為終極篇，阿倫表示：「完咗香港10場，仲會喺內地巡迴，約兩年時間，我曾經同粉絲有個唱到80歲嘅約定，所以我唔會唔唱，只係表演形式唔同咗，（會唔會巡唱尾場再返香港場？）未諗喎，有人提議過去啟德開3至5場添，不過睇吓場館嘅配套成唔成熟先啦，(香港站10場會唔會再加場？)唔會啦，十全十美。（門票供不應求喎？）我自己人飛都欠咗兩場半，不過公開發售時有機會撲到嘅。」

阿倫香港站只演10場，他謂跟身體狀況無關，只是對演唱會要求高，加上要顧及年長的身體狀況，不想粉絲為捧他場太操勞，他說：「我有位住老人院嘅粉絲過百歲，佢仲識唱《朋友》，都有11歲粉絲，但只係小部分，需要培育。」問到不再舉行大型個唱，可感不捨？他就話想留私人時間陪家人。至於兒子可會返港捧場？他又大賣關子：「自己諗啦。（兒子會上台？）唔會啦。」

問到演唱會可有邀嘉賓？阿倫指為個唱準備200首經典歌，已準備好提歌詞機，由於騷上都不夠時間唱，所以不邀嘉賓，況且不想麻煩圈外朋友，如想合作可私下再約。他又說新歌《我在意》本想和兩位圈中朋友合唱，但因歌曲是向他自己致敬，所以最後決定由自己獨唱。

阿倫將於紅館開騷。

大談遇車禍傳聞。

大會送上《阿倫日報》作為紀念。

兒子譚曉風會上台？